Nhar it-Tnejn, fil-Knisja tad-Dumnikani fil-Birgu, niċċelebraw b’devozzjoni l-festa tal-Eżaltazzjoni tas-Salib Imqaddes, festa li tfakkar is-sinifikat profond tas-Salib bħala s-simbolu ewlieni tal-fidi Nisranija u tal-imħabba ta’ Kristu lejn l-umanità.
L-oriġini ta’ din il-festa tmur lura għal Ġerusalemm fis-seklu erbgħa. Fit-13 ta’ Settembru tas-sena 335 ġiet ikkonsagrata l-Bażilika tal-Qabar ta’ Kristu, u l-għada, fl-14 ta’ Settembru, is-Salib Imqaddes ġie muri u espost b’mod solenni għall-qima tal-poplu.
Minn dak iż-żmien ’l hawn, il-festa tal-Eżaltazzjoni tas-Salib infirxet fil-Knisja kollha u saret okkażjoni biex il-fidili jerġgħu jħarsu lejn is-Salib mhux biss bħala sinjal ta’ tbatija u mewt, iżda fuq kollox bħala sinjal ta’ salvazzjoni, tama u rebħa.
Is-Salib ifakkarna fil-passjoni u l-mewt ta’ Ġesù Kristu, iżda fl-istess waqt iwassalna għall-ferħ tal-Qawmien. Huwa għalhekk li din il-festa hija stedina biex, quddiem id-diffikultajiet tal-ħajja, inħarsu lejn Kristu u nkomplu nimxu warajh b’fidi u tama.
Il-programm tal-festa
Il-komunità Dumnikana qed tistieden lill-fidili biex jipparteċipaw fiċ-ċelebrazzjonijiet liturġiċi tal-festa.
- 7:30am – Quddiesa, li warajha tingħad il-Litanija tad-Demm ta’ Kristu u jsir il-bews tar-Relikwija tas-Salib Imqaddes.
- 10:00am – Quddiesa, li warajha tingħad ukoll il-Litanija tad-Demm ta’ Kristu u jsir il-bews tar-Relikwija tas-Salib Imqaddes.
- 5:45pm – Talba tal-Via Sagra.
- Wara l-Via Sagra ssir Quddiesa Kantata, immexxija mill-Pirjol, P. Aaron Zahra OP.
- Fi tmiem il-quddiesa ta’ filgħaxija jsir ukoll il-bews tar-Relikwija tas-Salib Imqaddes.
Il-festa tal-Eżaltazzjoni tas-Salib tibqa’ għalhekk mument ta’ fidi, talb u devozzjoni, fejn il-komunità tingħaqad biex tagħti ġieħ lis-Salib Imqaddes u timmedita fuq l-imħabba kbira li Kristu wera għall-umanità bħal ma' kien jagħmel ta' kuljum Missierna San Duminku.
Nistiednu lill-poplu tal-Birgu u lil dawk kollha li għandhom devozzjoni lejn is-Salib Imqaddes biex jattendu għaċ-ċelebrazzjonijiet u jieħdu sehem f’din il-festa sabiħa ta’ fidi u tradizzjoni.
