F’dinja mgħaġġla, mimlija storbju, distrazzjonijiet u impenji, għad hemm post għat-talba tar-Rużarju? X’tista’ toffrilna din it-talba antika fil-ħajja tal-lum? U għaliex il-Knisja għadha tħeġġiġna biex nitolbuha?
Għal sekli sħaħ, ir-Rużarju Mqaddes kien parti importanti mill-ħajja spiritwali tal-Insara. Huwa talba sempliċi, iżda fl-istess ħin profonda; talba kontemplattiva li, permezz ta’ Marija, tistedinna nimmeditaw fuq il-ħajja ta’ Ġesù Kristu u l-misteri tas-salvazzjoni tagħna.
Iżda llum, meta r-ritmu tal-ħajja nbidel daqshekk, wieħed jistaqsi: Ir-Rużarju għadu jitkellem mal-bniedem tal-lum? Huwa biss ripetizzjoni ta’ kliem, jew jista’ jkun mezz biex nidħlu f’relazzjoni aktar profonda ma’ Alla?
Dawn u mistoqsijiet oħra se jkunu fil-qalba ta’ diskussjoni interessanti bit-titlu “It-Talba tar-Rużarju għadha relevanti llum?”
F’din il-laqgħa se jkollna magħna lill-Arċisqof Emeritu George Frendo OP u lil Patri Aaron Zahra OP, li se jidħlu fi djalogu dwar it-tifsira, is-sbuħija u l-importanza tar-Rużarju Mqaddes fil-ħajja tal-Knisja u tal-Insara tal-lum.
Din mhijiex se tkun biss taħdita fejn wieħed joqgħod jisma’, iżda opportunità biex naħsbu flimkien, niddiskutu u nistaqsu. Se jkun hemm ukoll ħin għall-mistoqsijiet minn dawk preżenti.
Kemm jekk titlob ir-Rużarju ta’ spiss, kemm jekk ilek ma titolbu, jew saħansitra jekk qatt ma fhimt sewwa x’inhi din it-talba u għaliex għandna nitolbuha, din id-diskussjoni hija għalik.
M’hemmx għalfejn tkun taf kollox dwar ir-Rużarju. Biżżejjed tiġi b’qalb miftuħa, b’kurżità u, forsi, b’xi mistoqsija li ilek tixtieq tistaqsi.
Ejja, Isma’ u Staqsi!
Is-Sibt, 24 ta’ Ottubru 2026
Ħin: 10:30 ta’ filgħodu
Post: Il-Kunvent tad-Dumnikani, il-Birgu
Nistednuk tingħaqad magħna għal din il-laqgħa ta’ riflessjoni u djalogu dwar waħda mill-aktar talbiet għeżież fit-tradizzjoni tal-Knisja.
Għax forsi l-mistoqsija mhijiex biss jekk ir-Rużarju għadux relevanti llum, iżda wkoll x’għandu x’jgħidilna r-Rużarju fil-ħajja tagħna llum.
