Il-lejla, il-Ġimgħa 9, u għada, is-Sibt 10 ta’ Ottubru 2026, se jkun qed jiġi ċċelebrat il-Birgu Fest, avveniment li jiġbed lejh bosta Maltin u turisti biex igawdu l-ġmiel, l-istorja u l-atmosfera unika ta’ din il-belt storika.
Għal din l-okkażjoni speċjali, id-Dumnikani tal-Birgu jinsabu mħejjija biex jilqgħu lill-pubbliku f’ambjent mill-isbaħ, mimli storja, kultura, tradizzjoni u spiritwalità.
Il-viżitaturi se jkollhom l-opportunità li jżuru l-kjostru storiku tal-Kunvent tad-Dumnikani, il-Knisja tal-Lunzjata u San Duminku, kif ukoll Dar id-Dumnikani fi Triq il-Mina l-Kbira, fejn se jkunu jistgħu jgawdu minn atmosfera mill-aktar sabiħa u akkoljenti.
Matul dawn iż-żewġ serati, se jkun hemm ukoll stands tal-ikel u x-xorb, biex dawk kollha li jżuru dawn il-postijiet ikunu jistgħu jqattgħu ħin ta’ mistrieħ u divertiment flimkien mal-familjari u l-ħbieb tagħhom.
Attrazzjoni oħra se tkun wirja mtellgħa fl-Oratorju tal-Madonna tar-Rużarju, li se toffri opportunità lill-viżitaturi biex japprezzaw aktar il-wirt storiku u reliġjuż marbut mal-preżenza tad-Dumnikani fil-Birgu.
Fil-Knisja tal-Lunzjata u San Duminku se jkun hemm ukoll kant minn kor, li se jkompli jsebbaħ l-atmosfera ta’ dawn is-serati u jagħti dimensjoni spiritwali lil din l-esperjenza.
Il-Birgu Fest mhuwiex biss okkażjoni ta’ divertiment, iżda wkoll opportunità biex wieħed jiskopri l-ġmiel moħbi tal-Birgu.
Id-Dumnikani tal-Birgu għalhekk qed jistiednu lill-familji Maltin u Għawdxin, kif ukoll lit-turisti kollha, biex iżuruhom u jaqsmu magħhom il-ferħ ta’ dawn iż-żewġ serati speċjali.
Titilfux din l-okkażjoni! Ejjew il-Birgu llejla u għada, gawdu l-atmosfera mill-isbaħ tal-Birgu Fest 2026, u fuq kollox agħmlu żjara lid-Dumnikani tal-Birgu, fejn issibu merħba mill-qalb.
Il-Birgu qed jistenniekom… u d-Dumnikani lesti biex jilqgħukom!
Share:WhatsApp
